Bansa Acheh Bèk Lé Keunong Peungeut

Inna Lillahi Wa Inna Ilaihi Raji'un,

Nyang Mulia Wali Nanggroë Acheh, Teungku Hasan Muhammad Di Tiro, ka neugisa bak Po teuh Allah Ta'ala.

Lam duka rakyat Acheh, takirém do'a beuNeupeuduëk droëneuh nyan bak teumpat nyang manyang dan mulia. BeuNeupeu-ampôn mandum salah dan dèsya di donya, dan beuNeuteurimong sigala amai dan perjuangan droëneuh nyan untôk Bansa Acheh sijahtra.

***

Yôh masa rakyat lam duka, kawôm èlit politék han dipiyôh chit dalam peuteubiët narit-naritseumeungeut untôk jak puta seujarah Bansa Acheh. Mulai yôh masa Wali Nanggroë sakét brat, peujabat indôn dan mafia perdamaian ka dikhianat droëneuh nyan.

Si uroë sigohlom Wali neugisa bak Po teuh, ka rôh droëneuh nyan dipeujeuët sibagoë warga indôn. Meunyo tapiké-piké keulai, meusineuk hana laba keu droëneuh nyan atawa keu geutanyoëBansa Acheh ateuh buët peu-indôn Wali nyan. Meuthôn-thôn ka droëneuh nyan jeuët keu warga nanggroë luwa, sibagoë tanda droëneuh nyan hana neu-angkèë neujeuët nanggroë indon; sibalék nibak nyan haté droëneuh nyan that toë dan sabé keu rakyat Acheh. Nyawong droëneuh nyan neujôk bulat-bulat keu Bansa Acheh. Geutinggai aneuk, peurumoh, dan hareuta untôk geutanyoë mandum, Bansa Acheh.

Meunyo droëneuh nyan chit peureulèë that untôk jeuët keu warga indôn, pakon jinoë? Pakon watèë malaikat maôt ka toë, watèë donya nyoë karap neutinggai? Padahai karap 5 thôn ka MoU nyan jitèkèn ôleh GAM dan indôn, pakon barô jinoë peureulèë that jeuët keu warga indôn?

Meunyo meunan, soë chit nyang peureulèë that supaya Wali jeuët keu warga indôn? Hana soëlaén nibak peujabat indôn keudroë dan mafia-mafia perdamaian nyang ka dikhianat Wali Nanggroë.

Tujuan ureuëng2 nyoë nakeuh untôk dipeusah bahwa Damé Acheh jinoë nakeuh cita-cita nibak Wali geutanyoë nyang mulia Teungku Hasan DiTiro.

Meuthat pih dumna carong ureuëng seumeungeut, pasti na narit bukti nyang han jeuët di som. Lagèë narit SBY, "Perlu saya sampaikan bahwa Bapak Hasan Tiro telah menerima kewarganegaraan atas permintaan keluarga dan handai tolan." [www.serambinews.com: uroë Jum'at, 4 Juni 2010. Respons dan Komentar. Utama]. Deungon nyoë, kon Wali nyang peureulèëjeuët keu warga indôn, kon droëneuh nyan nyang lakèë beudipeujeuët keu warga indôn, meulaénkan mandum buët pengkhianat2 nyang ditém peumalèë Wali geutanyoë nyang mulia dan ditém peutalô droëneuh nyan yôh watèë hana lé daya– chit buët biëk Pang Tibang.

Jinoë watèë Nyang Mulia ka hana lé, dirô ië mata dan dipeugah,“Beliau telah meninggalkan amanah (perdamaian- red) ini. Amanah ini harus dijaga, jangan sampai mengecewakan almarhum. Kalau amanah ini tidak bisa kita laksanakan, maaf, itu artinya sama dengan kita mengkhianati Wali, berkhianat dari perjuangan.” [www.serambinews.com: uroë Jum'at, 4 Juni 2010. Gelar Mujahid untuk Hasan Tiro]

Tadeungo beujroh hai aneuk Nanggroë meutuah, peuë nyang dipeugah. Yôh masa geutanyoëdalam duka lheuëh Tsunami, jitèkèn surat damè deungon musoh Endatu. Dingui nan Wali nyang ka tuha, nyang ka la’èh, nyang ka hana lé daya, diyuë koh beudé dan seumah Jakarta.

Jinoë yôh masa geutanyoë dalam duka neutinggai lé peumimpin nyang mulia, mantong chit dipeungeut geutanyoë, dikheun meunyo han jeuët tapeugot buët damè nyoë nyan meu-arti geutanyoë takhianat Wali, sabé-sabé dingui nan Wali untôk keupenténgan jih.

ék na mungkén tasokong damè meunyo dalam damè nyan hukôm hana teupeudong? Sampoëpajan ék tabéla damè meunyo dalam damè nyan korup hana abéh-abéh? Kiban tasokong meunyo janji-janji dalam damè nyan hana abéh dipeupunôh, sabé dipeungeut lagèë nyang ka ka. Wali keudroë sabé neupeuingat, "...hana damé meunyo kon meunang."

Meunyo meunan, peuë betôi damè nyang lagèë nyan nyang patôt tajaga? Peuë kadang damè Acheh nyoe nakeuh semeungeut mafia perdamaian mantong, nyang teungoh diduëk bak istana raya dan dikuët2 hareuta ateuëh nyawong ureuëng Acheh?

Hai aneuk muda Nanggroë, ka trok masa di gata untôk tapeuteupat seujarah Bansa.

Amanah dari Wali dan pejuang2 sigohlom droëneuh nyan ateuh bansa Acheh nakeuh "Acheh Mardéhka" kon "Acheh Damè Pura2."

---------------------------

"Adak pih durôh, leukang bak tangké, sayang boh haté meugantoë teuma"

Insya Allah, talakèë do'a nibak Allah Ta'ala, akan na teuma geulantoë peumimpin peujuang Acheh nyang beuhe untôk geudong rot agama Allah untôk geuba geutanyoë u masa ukeuëAcheh Mardéhka.

Kuta Raja,
Uroë Sabtu, 5 Juni 2010.


Madinatul Fajar