Pat Ujeuen nyang Han Pirang, Pat Prang nyang Han Reuda

Watee tadeungo Hadeh Maja, "Pat ujeuen nyang han pirang, pat prang nyang tan reuda", sabe teu-ingat geutanyoe yoh masa Acheh dalam prang- masa sigohlom GAM dimeudame deungon indon. Yoh masa nyan rata sagoe di Nanggroe Acheh rakyat udep dalam sengsara, tapi Peutuwah Endatu nyoe sabe jeuet keu ubat peunawa gondah lam dada. Harapan rayek han tom putoh untok meuteumeung kalon prang di Acheh reuda, dan rakyat jeuet udep dalam Nanggroe nyang sijahtra. Deungon na harapan dan keuyakinan nyan keuh ureueng Acheh jeuet geutheun dan geulawan mandum buet biadab tentra indon nyang jak elaya ureueng Acheh- saboh tanda ureueng Acheh that beuhe dan tabah dalam perjuangan.

Jinoe karap limong thon prang di Acheh reuda. Umpama masa bak ujeuen pirang, mandum makhluk diteubiet untok dimita raseuki; lat, batat, kayee, batee, mandum bahgia. Dalam hai nyoe, chit ka teukeudi alam bahwa na ureueng nyang meuteumeung le raseuki dan na chit ureueng nyang meuteumeung hana paditna - hana takira dilee peue keuh raseuki nyan haleue atawa han. Yoh masa ureueng gabhuek mita raseuki nyoe, na saboh useuha nyang jareueng teu-ingat tapi sebetoi jih saban peunteng deungon buet mita raseuki nyan keudroe, nakeuh useuha untok taseudia droe watee ujeuen baro trok teuka.

Meunan keuh jinoe keujadian di Acheh, yoh masa prang Acheh reuda, rame geutanyoe nyang tuwoe untok taseudia droeteuh keu masa prang ukeue. Meubagoe alasan, aleh chit ka sijahtra that udep di Nanggroe, aleh ureueng Acheh ka teumakot untok jak meuprang, atawa na alasan-alasan laen; peue nyang ka deuh, that pantang tapeubrok-brok dame di Acheh nyang jeulaih di peugot-peugot nyan, leubeh lom meunyo takheun narit "muprang lom". Sang watee takalon lagee hana le dithee bahwa mandum nyang na dalam donya Po teuh nyoe hana nyang keukai, dilawan chit teukeudi dan dimeukreuh bahwa dame di Acheh jinoe nakeuh dame nyang abadi.

Tapi nyang hireuen teuh, ureueng-ureueng nyang sokong dame antara GAM dan indon nyan diteupeue ngui kalimat "Pat ujeuen nyang han pirang, Pat prang nyang han reuda." dalam kampain dame jih, lagee dalam pidato Menteri Hukum dan Hak Asasi Manusia indon, Hamid Awaluddin, yoh ban diteken Nota Saban-Meuphom (MoU) di Helsinki, bak tanggai 15 August, 2005. [www.aceh-eye.org: Dibalik Proses Perdamaian Aceh, Kompas, Selasa, 16 Agustus, 2005]. Beuthat pih kalimat nyang dingui nakeuh Hadeh Maja "Pat ujeuen nyang han pirang, Pat prang nyang han reuda," tapi meukeusud nyang keuneuk dipeusak bak masa nyan nakeuh deungon diteken Nota Saban-Meuphom (Memorandum of Understanding - MoU) antara GAM dan indon di Helsinki, prang di Acheh jinoe ka trok bak akhe. Hana dithee bahwa kalimat nyang dingui nyan meumakna leubeh nibak sikada sikap untok teurimong prang nyang ka reuda - kon trok bak akhe, - meulaenkan teukeubah chit makna "uroe nyoe ujeuen jeuet reuda, tapi singoh atawa lusa ujeuen baro pasti trok teuka". Seulama mantong na ureueng Acheh nyang geuthee bahwa droegeuh ka keunong peungeut deungon janji-janji dame di Helsinki, dan mantong na ureueng Acheh nyang geuseumike buet peurjuangan, dan nyang leubeh peunteng lom -- jeuet takheun paleng peunteng -- mantong na ureueng Acheh nyang han geutem teurimong keuadaan di Nanggroe nyang maken si-uroe maken korap dan jahe, maka singoh atawa lusa pasti akan dibeudoh lom prang laen di Acheh.

Leubeh lom bak takalon jinoe, di Acheh ka teuka 'reudok' dan 'geulanteue'. Rame ureueng Acheh nyang teungoh geupreh ujeuen, saweueb ureueng nyan ka grah udep dalam dame nyang dipeugot-peugot. Teunyata ujeuen baroesa gohlom sep diba rahmat keu mandum ummat, baro sibahgian ubeut mantong nyang meuteumeung 'raseuki' dari ujeuen nyan. Kareuna nyan, geutanyoe sibagoe Bansa Acheh beujeuet tangui masa nyoe untok tapeugot sipeue2 nyang ka reuloh, tapeubeutoi sipeue2 nyang ka salah, dan taseudia droe teuh untok masa prang ukeue. Beujeuet sigo treuk ujeuen raya, gleh disampoh mandum rupa broh nyang na di tanoh Acheh dan beujeuet ujeuen nyan keu rahmat Poteuh Allah Ta'ala dalam bentuk Acheh Mardehka nyang sijahtra.

Kuta Raja, Uroe Seulasa, 22 Juni 2010.


Madinatul Fajar